صدى المحبة.. الى الشاعر عصام ملكي/ مفيد نبزو

رد على قصيدة الأخ الشاعر المهجري الحبيب عصام ملكي رئيس عصبة الزجل اللبناني في أوستراليا والتي فاضت بها قريحته الشعرية بعد صدور كتابي : (( شريل بعيني )) شاعر أمتي :

بعرف عصام الزجل خيَّالو   
وفارس طموحو فوق آمالو
فارس بإيدو شعلة الفرسان    
ع صهوتو ما في حدا يطالو
صحَّى بصوتو غفوة الوجدان  
وزلزل رموز الشر زلزالو
ورتل تراتيل السما بإيمان 
بلكي بيزهِّر حلم أجيالو
وبعدو ابن ملكي صدى لبنان    
صوت القداسة بطهر إجلالو
غنى بأشعار الزجل ألحان
وسكرت طيور السما بموَّالو
ويا ما غمس من ريشة الألوان   
يرسم وطن بخيوط مغزالو
حارس الأرزة وعبقر الوديان   
ياما القمر زارو بعرزالو
وكل همُّو راحة الإنسان 
ينعمْ ولا يعكِّر حدا بالو
بعرف عصام الشاعر الإنسان   
يِّلي فعالو بتسبق قوالو
الشاعر ابن ملكي إلو عنوان    
صَّياد ربَّات الوحي خيالو
ياما بخيالو رافق الميزان       
ويا ما دفق بالعطر شلالو
وبالليل في لو بالسما جيران    
نجمات شعوا بهالدني وقالو
شاعر الغربة وعاشق الأوطان   
من غربتو شو حنّ ع جبالو
ع الأرز ع الموجات ع الشطآن 
ع الذكريات ال صورتا قبالو
لو كان ملكي الأمر عندي كان   
لزرع بحضن الأرز تمثالو .
– محردة -

CONVERSATION

0 comments: