رباعيات/ رضا محمد السيد

الكريم طول عمـــره كريم
ما يرد من وقف على بابه
أمــــا الندل ديمــــــــا لئيم
وعتــــــــاب الندل إجتنابه .
**

إللى يعرف الدنيا على حقيقتها
عمره فى يوم ما هيبكى عليها
غداره وحذارى مــن ضحكتها
الكل مفارقها مهما عاش فيها .
**

أنا إللى ماليش حظ وديمــــــــــا كده منحوس
ولوجانى الحظ مرة بيجينى بالمعكـــــــــــوس
ألاقى نفسى إتوكست أكتر ما أنـــــــا موكوس
الحظ مش بس مـــال  مش كل حاجة فلوس .
**

أنــــــــــــا إللى الفقر كان ليا أعز صــديق
كل ما أروح فى مكان يسبقنى فى الطريق
لا عمره لحــظة سابنى وكأنه ليا رفيـــــق
يارب إمتى الفرج يا مفـــرج كل ضـــــيق .
**

أ مُنا هى الوحيدة إللى مـن قلبها حبتنا
وتبقى فى غاية السعادة بسبب  لـــمتنا
لمــــا كانت معانا مكناش نعرف قيمتها
يا خسارة عرفنا الحقيقة بعد مـا فرقتنا .
**

هـــــو أنت ليه ياحظ ديما عننا غايب ؟
وإن جيت لنا مرة تجيب معاك مصايب
نفسنا تصالحنا يـــا حظ ونبقالك حبايب
دا ربك عاوزنى كده مَتفكرنيش  خايب .
**

قولى ليه يا زمن زادت عداوتنا
وما عاد فى أمــان حتى فى بيتنا
فاكر زمان يـــــا زمن فاكر لمتنا
ليــه العداوة كترت وقلت محبتنا ؟