هو العيب فين؟/ د. ماهر حبيب

قرأت خبر أسعار الخضار الجديدة وبعدين بصيت على التعليقات لقيت الناس عماله تشتم وتسب وتقول لك دى أسعار لبياعى الخضار فى الزمالك والدنيا ما إتغيرتش والدنيا غالية وكأن الدنيا حا ترجع ستين سنة لورا وكأن كيلو الطماطم حا يبقى بشلن والبامية ببريزة وكيلو اللحمة بجنية علشان إحنا عملنا ثورة والحكام كانوا مغليين الدنيا ولازم كل حاجة ترجع لأيام الملك فاروق وطبعا هى دى المصيبة الحقيقية إن الناس مش عاوزه تفهم إن فيه مشكلة وإن الحل مش فى الحاكم بس لكن المشكلة فى الحاكم والمحكومين.
لما عملنا ثورة تم تهييج الناس لأن مبارك كان عاوز يعمل إبنه رئيس وكمبدأ توريث وعدم كفاءة يبقى الموضوع غلط فى غلط لكن مبارك كان بيعمل كل إللى بيعمله الشعب من أيام الجنية الجبس فالقاضى بيورث وظيفته لإبنه والظابط بيعمل كده كمان و دكتور الجامعة حاجز كرسى الجامعة لننوس عين إبنه والعامل فى مصلحة بيقطع الدنيا علشان إبنه يتعين فى المصلحة فالعيب فى الحاكم وشعبه.
لما عملنا ثورة كان الناس زعلانين على إن مبارك وشلته فاسدة وتدور على حد تانى فاكر نفسه فاسد تلافى مفيش فإحنا شعب زى الفل ملايكة ويا عينى كان مبارك وشلته هما بس إللى فاسدين وتدور تلف تدور علشان تعثر على واحد فاسد فتلاقى مهمة إيزيس فى البحث على جثة أوزوريس أسهل من إنك تلاقى واحد يقول لك أنا فاسد مع إن تلميذ الإبتدائى إللى بيغش من زميله فاسد والمدرس إللى بشرح على قد فلوسهم ومستنى الدروس الخصوصية فاسد وناظر المدرسة إللى بيخلى كل مدرس يعمل ما بدى له حتى لو كان إلغاء تحية العلم برضه فاسد وسواق التاكسى إللى بيلعب فى العداد فاسد والموظف إللى بيفتح الدرج علشان مرتبه ما بيكفهوش فاسد ورجل الأعمال إللى بتهرب من الضرائب فاسد وإللى بيزوغ من شغله فاسد والدكتور إللى بيستنزف مريضه علشان الفلوس فاسد والمهندس إللى بيفتح دماغه علشان الأدوار المخالفة فاسد وتبص حواليك تلاقى إن الحياة بقى لونها فساد ومبقاش لونها بمبى خالص  فالعيب ليس فى مبارك وحده فالعيب عيب شعب.
ولما عملنا ثورة قال لك أيه؟ ثورة علشان الحرية وروحنا أيه مفهمين الناس يلا غار مبارك وغارت الشرطة ويلا كل واحد يعمل إللى على كيف كيفه وهات يا إضرابات وهات يا إعتصامات وهات يا بلطجة وهات يا فوضى وهيييه الدنيا بقت حرية بدون إلتزام وشخبطنا ع الحيطة وعملنا ظيطة وبطلنا شغل وقطعنا أرزاق بعض ويلا يا حكومة أكلينا السياحة حرام ويلا يا حكومة عوضى كل بتوع السياحة عن قطع أرزاقهم الناس أصحاب المصانع بيوتها إتخربت من وقف الحال ويلا يا حكومة أكلينا من غير ما نشتغل وحكومتنا دلوقتى حكومة مسنة عاوزة تخلص من المهمة من غير ما تخش طره والشعب فاكر إن السيسي عنده مصباح علاء الدين وحا يطلع له العفريت ويقول له شبيك لبيك مصر حا تبقى جنة على إيديك من غير تعب من غير مجهود وكله حا يبقى فل الفل .....يا خلق هوووه لو ما غيرتوش من حالكم لو ما عرفتوش إنكوا لازم  تتعبوا وتشقوا وتدوا البلد حقها.. لو ما فصلتوش الدين عن الدولة وخرجتوا من حال الفصام بين التدين الظاهرى والفساد الشديد يبقى الحال على ما هو عليه ولن تسير المركب حتى لو جالكوا جيش من الملايكة ..فلا بد أن تنظروا لوجهكم فى المرآة وتروا عيوبكم ولتروا الخشبة التى فى عيونكم وليس القذى فى عين أخيك

CONVERSATION

0 comments: