سوق زهر وبلوط/ عصام ملكي

لبنان يا لبنان صوتك مش إلك
ومنستحي ان جينا تا عنك نسألك
عا الشعر فيك ملوك عم بيعّينو
هللي ولا مره "عا المنابر بيّنو"
البهله ما فينا نقول عنو "شكسبير"
ومنو الشويعر عندنا شاعر قدير
وما في حدا بالتسميه بيعمل ملك

بدنا شعر ما تستحي فيه السطور
يعطي بلاغه وتنشرح فيه الامور
هيدا بيقولو ناطح شموخو السما
وهيدا امير المنبرين بينسما
ومن حيث نحنا هون ما منغلي حصى
عطينا لقب معّاز للحامل عصا
وقلنا "بو زهره" لكل من بيّع زهور

المنـّو حدا بالشعر مش ممكن يصير
بكتر الحكي والكنفشه شاعر كبير
الما بيفهمو بالشعر يبقو عا جنب
ما في حدا "البلوط" بيقللو عنب
حكاية امير وبيك حاجي يألفو
فلان الفلاني مين بلله كلفّو
يسمّي ملك عا الشعر ويسمي امير