نظرا للضغط الشديد على حور العين نتيجة تزايد العمليات الانتحارية وضرورة توفير 70 فى 70 حورية علي الفرازة لكل منتحر مما أدى لعجز الجنة والقائمين عليها من عدم الوفاء بالعقد الموقع بين المنتحرين وبين الجنة بشهادة وجدى غنيم وأسامة بن لادن وشريكهم أﻷمريكانى البومة أوباما فقد قررت  إدارة الجنة عمل إعلان طلب وظائف بالرغبة فى التعاقد مع غوانى بصفة عاجلة و مرتبات مغرية مع إمكانية العمل بأوفر تايم والدفع بقيمة الساعة بساعتين عند الحاجة لذلك.

وقد إشترطت الجنة أن تكون الغانية الجديدة بيضاء البشرة زرقاء العيون ومن ذوات الشعر اﻷشقر وخالية من اﻷمراض المزمنة لضمان عدم تغيبها عن العمل للتمكن من حسن اﻷداء وضمان رضاء أﻷخوة المجاهدين الذين فجروا أنفسهم طمعا فى نوال الحور العين.

وقد تم عمل مناقصة لعمل توسيع الجنة وإقامة فرع الجنة الجديدة علي طريق الجنة الصحراوى مع وضع خطة مستقبلية لتوسعة جديدة حيث أن الشواهد ترجح تزايد عدد المنتحرين فى الفترة القادمة.

هذا وقد حدث إرتباك شديد فى الجنة بعد أن تبين نقص عدد الحوريات وعدم المقدرة علي توفير الحوريات 24 ساعة وتوفيرهم لمدة 20 ساعة فقط فثارت ثائرة المجاهدين وهددوا بنسف الجنة فتم التراجع وتم إستدعاء حوريات كانوا فى أجازاتهم السنوية مع ضغط جدول العمل ولكن إلي فترة قد لا تطول.

وقد باءت كل المفاوضات مع المجاهدين وقائدهم محمد عطا من أجل تخفيض ساعات ممارسة الجنس لمدة 18 ساعة وتوفير حمامات سباحة وجلسات مساج عوضا عن الست ساعات المقترحة وتم رفض كل المحاولات الفرجة علي قنوات روتانا والجزيرة فتم رفض معظم المفاوضات وتم الإتفاق على توفير قنوات بورنو كنوع من التحفيز المجاهدين الشهداء المنتحرين.

أما النقطة اﻷخيرة والتى تم التنبية عليها عدم رضاء المجاهدين عن نوعية الحبة الزرقاء اللازمة لحسن اﻷداء والقوة غضبهم من توزيع حبات فياجرا غير اصلية من مصانع غيرمصانع شركة فايزر وتوزيع فياجرا مصرى وهندى أثرت سلبا علي بعض المجاهدين وحدوث مشاجرة مع غانية جديدة فى الكار بسبب الحبوب المضروبة .

وعلشان كده مفيش مشكلة حا تقابل المجاهدين المنتحرين بعد إنشاء جنة جديدة ومصنع فياجرا أصلي فيها وتوفير الغوانى بعد إعلان الجنة عن الوظائف الجديدة بعنوان مطلوب غوانى

إتكعبلت فى خبر كارثى بيقول إن دار الإفتاء ردت بفتوى إن التطعيم ضد شلل الأطفال حلالا بلالا وليس حراما وطبعا ده يبين الدرك الأسفل إللى وصل ليه المجتمع فالمصيبة فى السائل والمسئول والناقل والمنقول فقد وصلنا إلى مرحلة من العته الفكرى يسأل فيها السائل بديهيات ويرد المسئول بفتوى ويخرج الصحفى لينقل ويهلل للفتح العظيم التى أتت به الفتوى بما لم يأت به الأولين وينقلها عن طريق جريدة أو موقع ليحتفى بها العامة والجهلاء.

فعندما يصل السائل إلى الحيرة واللجوء لرجال الدين فى قضية طبية معروف نفعها وثبتت فاعليتها وقامت بوقاية الملايين من البشر ليحتار السائل هل هى حلال أم حرام فتلك مصيبة فقد لغينا عقول البشر وأوكلنا لأخرين أن يفكروا بدلا منا فما يقولوا عليه حلال نفعله حتى لو كان إرهابا ونحجم عن ما يحرمونه حتى لو كان لقاحا لمرض عضال.

ثم يأتى دور المفتى الذى يفتى بالفتوى ( وليس مفتى الجمهورية بشخصه) ليدلو بدلوه فى قضية طبية فتلك كارثة فلو حسم الأمر بأن هذا سؤال فى ناحية طبية ليس للدين علاقة من قريب او بعيد وأنه يعمل مفتيا للأمور الدينية وليس طبيبا متخصصا فى الطب ليغلق بابا نتمنى إغلاقه وهو محاولة ربط الطب بالدين وهو ربط مخيف بين الثابت والمتحرك بين الحقيقة العلمية وموروثات تتعلق بزمان كان الطب فيه ضربا من الخيال بل نستطيع أن نقول أنه لم يكن موجودا فعندما يسأل شخصا عن تحريم أم تحليل الكهرباء أو الموبيل فذلك نوع من السذاجة المخلوطة بالجهل وقصر النظر وعدم إستخدام العقل

ثم نأتى على ناقل الجهل وهم الصحفيون و كاتبى الأخبار والذين ينشرون تلك الأفكار الساذجة بإعتبارهم يطمئنون الناس بأن حياتهم حلال فى حلال حتى التطعيم وتحريم قطع يد السارق المصاب بالسكر فإذا بهم يأصلون عن طريق وسائل الصحافة بأن العقل لابد من إلغاؤه ويجب أن يأتى لنا الشيخ حسن ( عادل إمام) ليقول لنا الدين بيقول أيه؟؟؟!!!

المجتمع الأوربى الأن مثله مثل الثوب العتيق المهلهل الذى تمزق بفعل الزمن وقد إخترقه الإرهاب وعشش فيه مختبئا فى ثنايا هذا الثوب وقد أصيب هذا المجتمع بالشيخوخة وفقدان الذاكرة الحديثة وأصبح لا يتذكر إلا الزمان الجميل وقت أن إشترى الثوب وكان جميلا وغاليا إشتراه منذ عصر النهضة ودفع فيه الغالى والنفيس من متجر فخم يسمى الحرية وأصبح لهذا المجتمع ذاكرة السمك لا يتذكر شيئا مما يحدث حوله فيعود من حيث أفلت للحظات قريبة إلى سنارة الصياد ليقع المرة تلو الأخرى ويصبح لقمة سائغة لمن يصطاد ومن يشترى.

هم يؤمنون بالحرية ويقدرونها ويعتقدون أن الأخر سيقدرها ولن يسيئ إستخدامها وتقع الحادثة تلو الأخرى فيتذكرونها لثوان معدودات ثم يعودوا ليغنوا نفس الإنشودة القديمة حرية حرية وينسوا أن لديهم مشكلة تنخر مجتمعهم تحتاج إلى الإصلاح ولا تحتمل التأجيل.

لديهم الإنترنت والذى أصبح وكرا للإرهابيين يتبادلون فيه التعليمات ويخططون ويتواعدون وينفذون تلك العمليات الإرهابية دون أن يتفتق ذهن القارة العجوز إلى أنه يجب وقف هذا الخطر وترك الحبل على الغارب فماذا سيخيف الإنسان من أن تكون هناك رقابة على ما يتداولونه على الإنترنت ما لم يكن وراء ذلك الخوف من شيئ ما ؟ ولماذا تكون هناك حرية مطلقة بإنشاء حسابات وهمية للإيميلات وحسابات التواصل الإجتماعى؟ ولماذا التشدق بحرية منفلته تؤدى إلى إراقة الدماء وجعل العالم فى وضعا أسوء مما يحلم به؟

والسؤال الأصعب هو لماذا تحتضنون الجماعات الإرهابية وترعونها أو على الأقل تتعامون عنها متصورين أنكم بمنأى عن ضررها مادامت تقتل وتذبح بعيدا عنكم؟

أتساءل لماذا تحركت الجيوش وإنقلب الحال بعد حوادث إرهابية تعد على أصابع اليد الواحدة ولم تهتموا عندما تم تهجير مسيحيي العراق بأكمله وبعد أن عملت يد الإبادة فى الإيزيديين وعندما ذبح الدواعش كل من يختلف معهم من مسلمين وغير مسلمين؟ ماذا فعلتم من أجل نيجيريا وقد أقامت بوكو حرام مجزرا أليا للبشر وأقامت مجازر يندى لها الجبين؟ ماذا فعلتم عندما أزاح الشعب الإخوان بعد أن تسلطوا على الشعب المصرى ثم أذاقوا الشعب المصري كل أنواع الإرهاب؟

مشكلتكم أنكم تعتقدون أنكم الأفضل فى كل شيئ ولا تستمعون لأهل الخبرة مغرورين إلى أقصى درجات الغرور حتى أصابكم الصمم والعمى ولم تعودوا قادرين على إتخاذ القرار الصحيح......إرهابنا وإرهابكم واحد نفس الفكر ونفس الأشخاص ونفس الوسيلة ونفس المصير ولكن الفرق بيننا وبينكم أننا عرفنا هذا الإرهاب وإختبرناه وإستفدنا من خبرات الفشل والنجاح أما أنتم فمثل المريض الذى يعيش فى بالونة معقمة خالية من الميكروبات وفجأة وجد نفسه فى مستنقع قاذورات وقد تراكمت عليه الميكروبات دون مناعة سابقة فيصاب بأشد أنواع الأمراض لأنه عديم المناعة مثله مثل مريض الإيدز ويبدوا أنكم مصابين بخرف الشيخوخة و مرض نقص مناعة الإرهاب معا

المارشال السيسي جاء لينقذ مصر تماما مثلما فعل مشروع مارشال فى أوربا المدمرة بعد الحرب العالمية الثانية فمصر الأن تحتاج إلى من ينقذها بعد أن ضربها دمارا شاملا بعد نكسة يناير قسمت البلد وأضعفتها وحولتها إلى شيع تحارب بعضها وكما حدث فى حرب هتلر وموسولينى حيث تحارب الحلفاء والمحور ودمروا بلادهم وإحتاجوا إلى مشروع إعمار ينقذ الأوربيين من الجوع والدمار.

وجاء السيسي ليتنهز فرصة ذهبية ليصلح أخطاء الجميع الجيش والشعب والسلطة فقد أخطأ الجيش أخطاءا فادحة منذ نكسة يناير عندما إنحنى للعاصفة وإرتكب مجموعة من الأخطاء أدت إلى تسليم البلد لمجموعة من الخونة تسعى لدمار مصر ولا يمكن إعفاء الجيش من تلك الأمور فرفض الجيش لفكرة تولى جمال مبارك للسلطة جعلتهم يهربون من الرمضاء للنار ونسوا أو تناسوا أن الإخوان عدو للبلد وأنهم لم ولن يتغيروا منذ نشأتهم حتى إنتكست البلد بهم فى 2011.

وأخطأ الشعب الذى صدق بأن هناك ثورة فدعمها بطريقة مباشرة عندما خرج السذج من المطحونين ولم يكتشفوا إلا أنهم مجرد حطب فى مسلسل حرق البلد ثم عادوا إلى بيوتهم بعد أن أقنعهم المنتفعين بأنهم حماة هذا البلد ولكنهم أرادوا صرف الشعب لبيوتهم ليجلسوا فى الميدان يقتسمون تورتة الحكم بينهم.

وأخطا الحاكم السابق مبارك عندما تأخر عن الإلتفاف على المؤامرة فصار ضحية أيضا بعد أن إعتقد أنه خرج سالما من المعركة وبعد أن أراد حقن دماء المصريين ليجد نفسه مدانا بقتل متظاهرين أغلبهم قتل فى أثناء محاولتهم لهدم سلطة القانون بإقتحام السجون وأقسام الشرطة

كما أخطأ كل من تولى الحكم حتى جاء الخائن مرسى بأن سمح بتدمير مؤسسات الدولة مع وجود طوفان النكسة فالجميع خاف وإنسحب وسط جوقة الثورجية والمنتفعين بالتحالف مع الخونة.

إنها فرصة للمارشال السيسي أن يقوم بمشروع مارشال لبناء مصر الجديدة مع الحذر فى أن يقع فى فخ التصالح مع الخونة فهؤلاء خارج حسابات مصر والمصريين ووجودهم فى الحياة السياسية مثل السرطان لا يهدأ إلا بعد أن يقضى على الجميع

بعد ان أطلق مرشد الإخوان شرارة الحرب الأهلية وبعد أن إنطلقوا بحماقة وشراسة ليقتلوا المصريين ناشرين الفوضى فى كل بقاع مصر يجب أن يحاكم هؤلاء بكل قسوة لأنه ليس هناك تهمة أو جريمة أشنع من الخيانة العظمى ولا أعتقد أن هناك هامش من التسامح أو التهاون أو التخاذل فى وتهمة بحجم حرق مصر أو إشتعال الحرب الأهلية بها لأول مرة فى التاريخ.

لقد كان هناك دعوة للتسامح وكنت واحد من كثيرين طالبوا بأن تكون ثورة 30 يونيو هى نهاية الصراع وبداية صفحة جديدة نبدأ فيها مرحلة جديدة تعيد الحياة بمصر ولكنى أقر بأنها كانت دعوة خاطئة وحسنة النية لأنها كانت موجهة فى الأساس إلى المصريين المخلصين ولكن إنفضح الطرف الأخر حيث وضح أنه يأتى على حصانا أمريكيا لتنفيذ مشروعا لا يختص مصر بل هو مشروعا خاصا بهم هم فقط دون شراكة من أحد فمن ليس منهم فهو عدوهم فكيف ندعوهم للشراكة وهم غرباء عن الوطن بل خونة للتراب المصرى.

لقد إخترع الإخوان المجرمون موقعة الجمل والنى عاش المصريون وهم تلك الموقعة ومحاولة إلصاق تلك الموقعة بالنظام السابق وكانت لتلك الخرافة عاملا مهما فى رحيل الرئيس الأسبق مبارك ولأن الكذب مالوش رجلين فقد حدثت نفس الموقعة بنفس الفاعلين ونفس المحرضين ولكن مع إختلاف واحد هو إستبدال الجمل الذى كان رمزا للواقعة إلى  عربة إسعاف جاء بها مرشد الإخوان المجرمين لتنطلق بعدها نفس الحرب فى ميدان عبد المنعم رياض لتعيد نفس المشهد من ملوتوف وطوب وقتلى ومحاولة إفزاع التحرير و متظاهريه فى المرة الأولى للتحفيز لإستقالة الرئيس الأسبق واليوم للمطالبة بعودة المخلوع الإخوانى .

لقد نفذ الإخوان بجلدهم من موقعة الجمل لأنهم كانوا فى الحكم والأن هم خارج الحكم والفرصة مواتية لعودتهم للسجون بتهمة حقيقية واضحة ومسجلة فى جميع تليفزيونات العالم على موقعة حقيقية وهى موقعة عربة الإسعاف فقد خرجوا لقتل من يختلف معهم رافضين أن تعود مصر للحياة بل يردونها أسيرة فى مغارات تورابورا يردونها إرهابية ترعى الإرهاب وتقتل من يخالفها ونحن لن نسامح من دفع مصر للهاوية سواء بموقعة الجمل أو موقعة بديع موقعة عربة الإسعاف 

الظاهر إن الدكتور مرسى ناسى النتيجة بتاعته على الموبيل والكومبيوتر والحيطة والنتيجة عنده معلقه على يوم 30/6/2012 وفاكر إن الزمن توقف والساعة ما بتمشيش وإن النتيجة مشيت سنة بحالها وهو لسه قاعد فى ميدان التحرير فاتح صدره ومش لابس القميص الواقى ونتيجة إنه فاقد الزمن فالموضوع بالنسبة له غريب قوى إن فيه تمرد وإن الناس نازله نازله يوم 30/6 بس سنة 2013 ومش 2012 وطبعا إنتو عارفين إن فيه حاجة إسمها إرتجاج فى المخ لما الواحد ينخبط فى نافوخه  فى حادثة أو ما شابه ويفتكر كل حاجة ما عدا إللى حصل له ساعة الحادثة وبعدها وحالة فقدان الذاكرة بتفضل موجودة بالكتير عشرة خمستاشر يوم ويرجع الواحد لطبيعته بالتدريج لكن فوز الإخوان بالحكم عمل إرتجاج لمرسى نساه الدنيا سنة بحالها وشكلها كده قلبت بمشكلة مزمنة حا تفضل لغاية ما يرحل وبعدها يسأل هو فيه أيه؟!!!

الناس كلها شايطة ومرسى وأتباعه فى دنيا تانية.. الناس صبرها نفذ وهو ولا هو هنا ..الدنيا كلها خربانه والناس حواليه بيقولوا له ولا يهمك ياريس من الناس ياريس وعمالين يغنوا له قول ما بدالك وإحنا فدائك ودراعك اليمين والمشكلة إللى مش عارفها إن درعاته الإتنين متحوطين بالناس المتمردة ولا حا ينفعه شطارته وحا يكتشف إن المتغطى بيهم عريان وحكاية إن الدنيا ربيع والجو بديع ما تنفعش تتغنى أثناء خريف الغضب إللى الناس كلها فى مصر عايشاه ما عدا السبعتاشر ألف إللى كانوا فى الصالة المغطاة يقبلون يد مرسى ويهتفون له ويقولوا له أووو أووو.

بصراحة أنا مش شايف واحد مخلص لمرسى ينصحه وعلى رأى المثل يا بخت من بكانى وبكى على أفضل من ضحكنى وضحك الناس على ودى مشكلة حكامنا إنهم سايبين الشلة حواليهم تقول لهم ليس فى الإمكان أفضل مما كان والنتيجة إنهم بيلبسوا فى الحيط وبعدين يبكوا على اللبن المسكوب وطبعا مرسى ليس إستثناء بس المشكلة إن الرؤساء التانيين كانوا جامدين قوى لدرجة إن خلعهم جه بخلع الضرس أما مرسى وحكمه وصل فى 52 أسبوع للى ما وصلنلهوش من سنة 52 بهدلة قلة قيمة تمرد من كل نوع تخبط على أعلى مستوى تصريحات أقل ما توصف أنها تصريحات عبيطة تعينات ترمى النار على البنزين 95 الموجود مش 80 إللى بيروح الأنفاق مع السولار ولو مرسى تخفى فى صورة شخص عادى ومشى فى الشارع حا يكتشف إن الجماعة بتضحى بيه ليغنى رسالة من تحت الماء إنى أغرق ويقول لو أنى أعرف خاتمنى ما كنت بدأت.

إنزل يا مرسى الشارع طوف وشوف فقد ولى زمانك وإنتهى فقد كرهك شعبك وفقد ثقته فيك والجميع يحملك أنت المسئولية ولا لوم على شاطر عريان أو بديع فأنت الواجهة وأنت من سيسقطك شعبك وباقى من الزمن أيام وتسونامى الثورة الحقيقية قادم فهى ليست ثورة كنتاكى أو سندوتشات الحواوشى وهناك فرصة ضئيلة لنجاحك لو إكتشفت من خانوك ويخونوك وهم أهلك وعشيرتك وحاسبتهم حسابا عسيرا ونفضتهم عنك وطلبت معونة شعبك كل شعبك فستنجو من الكارثة التى تعيشها ولا تحس بها والحقيقة أن الخيانة من أقرب الناس مرة وقاسية لكن أن تفوق من الصدمة فهذا هو المقياس الحقيقى للشخص السوى القوى لتكون جديرا بحكم مصر لا نزيلا فى اللومان ولا تكون مثل الزوج الخدوع الذى يكون أخر من يعلم وأن تحطمه الخيانة ويتحول من الزوج المحترم إلى حطام بنى أدم يبكى على الأطلال

زمان كان هناك الحنطور وكانت الناس تركب الحنطور مش علشان تتحنطر ولكن كوسيلة مواصلات وعندما تنطلق من مقعد الركاب وتنزل تتشعبط ورا الحنطور علشان تزوغ من صاحب الحنطور وتتحنطر يقوم السواق بتاع الحنطور ينده عليك ويقول لك ياواد إنزل ولما ما تنزلش ويكون واحد صاحب صاحب الحنطور معدى جنبه فيصيح كرباج ورا يا أسطى ولو ما كنتش لماح وذكى فتنط من الحنطور فسوف يلسعك الكرباج لما صاحب الحنطور يدافع عن حنطوره ليلسع المتطفل على حنطوره.

وهكذا لسع صاحب الحنطور الإيرانى المتشعبطين غلى خلف الحنطور ( السورى) لكل من يحشر أنفه فى الموضوع السورى وبدل ما يلسعه بالكرباج حا يطلع له السيديهات إزاى قتل الثوار وإزاى هرب من السجن وإزاى سرق المرحومة ثورة وإزاى زور الإنتخابات وإزاى عمل إتصالاته مع الحاج أوباما وإزاى نط ع الحكم وإزاى وإزاى إزاى أوصف لك يا مصرى إزاى قبل ما أغشك كنت إزاى يا خبيبى وطبعا منعا للفضايح فقد قرر المتشعبط عن الحنطور أن ينفذ بجلده مؤقتا ويبيع أصحابه فى سوريا ما أصلا هو مستعد يبيع أخوه مش حا يبيع صاحبه ما هو يا روح ما بعدك روح  وبلاش الكرباج الإيرانى فى الوقت ده.

وطبعا لو الناصحين إللى خدوا أكبر مهموز فى حياتهم لما متشعبطى الحنطور أكلوهم البلوظة فى ميدان التحرير وخلعوا بكل حاجة وهما قاعدين يلطموا ويولولوا وبيغنوا أغنية تخونوه وعمره ما خانكم إنهم يسيبوهم من أوباما والإتحاد الأوربى الكلمنجى وفعل مفيش ويروحوا لمغارة على بابا الإيرانى ويقولوا سلفنى 3 سي دى من المغارة عندكم علشان نفضح صاحبنا ونعرف هو نط من ع السور إزاى ورقم تليفون الثريا كام ومين سواق التوك توك إللى خده لميدان التحرير ونوع البلوظة إللى شربتوها أيه خليتكوا فى غيبوبة 18 شهر لغاية ما صاحبنا ركب الحنطور المصرى وضربكوا أنتوا بالكرباج بعد ما جاله هاتف من المقطم وهو بينده ويقول كرباج ورا ياأسطى

مروة الشربينى ماتت مقتولة فى خناقة مستمرة  ونزاع محاكم وقضايا وخلاف بنها  وبين مواطن ألمانى ووصل التصعيد إلى  إنه قتلها وبعدها قامت الدنيا ومقعدتش علشان مروة إنسانة محجبة وهاج العالم الإسلامى من شرقه لغربة وولعت الدنيا فى مصر لأنهم إعتبروها جريمة كراهية موجهة ضد الإسلام وإحنجت وزارة الخارجية وقام وقعد وزير الخارجية وإستدعاء للسفير الألمانى وإعتذار رسمى من الحكومة الألمانية وجنازة محصلتش وتمثال لمروة كنوع من الإعتذار ولغاية النهارده مصر بتعاير ألمانيا علشان ألمانى قتل مروة .

ودارت الأيام ومشى حسنى وجاء مرسى وبدل ما الأمور تتصلح زاد الطين بله وجاء لنا رئيس ما يعرفش غير أهله وعشيرته وحتى المسلمين من خارج الأهل والعشيرة يخبطوا دماغهم فى أقرب حيط فما بال الأقباط إللى خارج الأهل والعشيرة وكمان فى نظر مرسى وإخوانه أقل من إنهم يتحطوا فى إعتباره ولقينا إخوان مرسى فى ليبيا بيستهدفوا الأقباط فيها ومفيش حاجة بتهز شعرة من مرسى علشان يقول لهم عيب دول مصريين وليهم قيمة مساوية لباقى المصريين لكن مرسى لا يرى لايسمع لا يتكلم فتفجير الكنيسة القبطية فى ليبيا ما هزتهوش مقتل 2 أقباط فى حادث التفجير ملفتش نظره وإعتقال 55 قبطى ما همهوش تعذيب الأقباط هناك ما حركش مشاعره وأخيرا مقتل عزت حكيم نتيجة التعذيب على أيد السلطات الرسمية الليبية ولا فرقت معاه.

وللعلم كان هنا فى مصر رئيس الوزراء الليبى فى زيارة لمرسى وكانوا الأقباط معتقلين ومكانش عزت إتقتل على أيد الليبين ومهانش على مرسى ولا قنديله إنه يقول له هو أيه حكاية الأقباط فى ليبيا وكان يطلب منهم حتى لو كانت هناك تحقيقات إنه تكون معاملتهم إنسانية ولكن كل ده محصلش ومشى الوزير الليبى ولأن مرسى مجابش سيرة أثناء أو بعد اللقاء مشى الليبى وهو بيقول لنفسه إذا كان الرئيس المصرى ما إهتمش حا أهتم أنا وإستمر تعذيب الأقباط حتى مات عزت شهيد على إيد المجرمين القتلة ولغاية النهاردة ولا حس ولا خبر وكأن مفيش حاجة حصلت.

ونقارن بين ردة فعل المصريين سواء على المستوى الشعبى أو الرسمى أيام مروة وأيام عزت نعرف الفرق ونعرف قد ايه النظرة للأقباط والكلام مش بس متوجه لمرسى وإخوانه وسلفيينه ولكن بعتاب لقطاعات كتيرة من الشعب المصرى وده بيفتح ملف المواطنة لكل المصريين مسلمين ومسيحيين سنة وشيعة وبهائيين و علمانين وكل أطياف البنى أدمين على تراب مصر فالدين علاقة بين الشخص وربه أما المواطنين فلهم حقوق وعليهم واجبات يتساوى فيها الجميع ولما نشوف إن ردة فعلة الجميع تتساوى بين مروة وعزت ساعتها نعرف إن مصر إتغيرت وخرجت من قمقم التطرف وحطت رجلها على أول خطوات اللحاق بالحضارة الإنسانية.

جلست والخوف بعينيها      

تتأمل ميدانى المنكوب

قالت ياولدى لا تفرح         

فمرسى عليك هو المكتوب

يالهوى يا لهوى

يا ولدى قد مات شهيدا       

 من كان من الإخوان مش محسوب

يا لهوى.... يا لهوي

بصرت ونجمت كثيرا        

 ولكنى لم أقرأ أبدا

ميدانا يشبه ميدانك

بصرت ونجمت كثيرا        

ولكنى لم أعرف أبدا

 أحزابا تشبه أحزابك

مقدورك أن تمضى أبدا      

 فى بحر الرئاسة بغير رئيس

وتكون حياتك طول العمر    

ندمانا على خلع المخلوع

فبرغم جميع كوارثه          

وبرغم جميع حوادثه

وبرغم الهم الساكن فينا ليل نهار

وبرغم التورييييث

وبرغم العادلى وزكريا وماما سوزان

فمرسى سيبقى ياولدى مبتدئ الإحزان

يامرسى ... يا لهوى

بحياتك ياولدى رئيسا بيهيس أخر تهيس

فمه بيطلع أى كلام

وصباعه بيحذر تخاف وتنام

والساعة شغلاه عن الكلام

قد يبدو المنظر مرسيا        

بينما هو المرشد يا سلام

لكن سماؤك ممطرة          

وطريقك مسدود مسدود

فرئيس الوطن يا ولدى       

نائم عند المرشد مسنود

من يدخل وكرهم من ينقد كربهم

من حاول نقد مرشدهم وشاطرهم يا ولدى مسحول مسحول مسحول

يا مرسى ....يا لهوى

ستفتش عنه يا ولدى   فى كل مزلقان

وستسأل عنه موج الدم        إللى مغرق كل مكان

وتجوب من حارة إلى شارع  وتصرف من جيبك ع الفاضى

وسيكبر همك حتى يصبح أطنانا ....أطنانا

وسترجع يوما يا ولدى ندمانا مكسور الوجدان

وستعرف بعد رحيل العمر    بأنك إنتخبت رئيس إخوان

ما أصعب أن تنتخب مرسى وهو نايم فى اللومان

ما أصعب أن تنتخب مرسى  ياولدى وإنت صاحى فى الميدان

فى الميدان فى الميدان

يا مرسى ....يا لهوى

بينما دخلت المرأة مجلس الشورى السعودى بنسبة 20%  فى خطوة رائعة وتقدم للأمام يستحق الثناء للقيادة السعودية فلن يدخل البرلمان المصرى الجديد تحت قيادة المرشد والشاطر ومرسى 20 واحدة ست من 500 نايب يعنى أقل من 4% والحقيقة مش بس المرأة فأنا أتوقع إن نواب النخبة والجبهة والبرادعى وصباحى وموسى مع المرأة والأقباط  لن يزيدوا عن 10 أو 15% على بعض وما تحلموش يا مصريين إن فيه حد حا يكسب الإنتخابات الجاية إلا أمات دقون أو أعضاء حزب الديكتاتورية والندالة مع حزب الضلمة والحازميون أما الباقى فحا يجيبوا لنا النقطة مش كراسى مجلس الشعب فالسيناريو المتوقع إن الأحزاب المدنية الورقية حا تتخانق مع بعض وحا يبتدى المزاد بقايمة واحدة وبعدين قايمتين تلاتة وبعدين تحصل الخناقة الكبيرة ويوم فتح باب الترشيح يطلع البهوات علينا بعشرين قايمة لعشرين حزب وكل حزب ياخد صابونة وإللى خدته القرعة تاخده أم الشعور.

طبعا بعد لعب العيال إللى ودانا فى داهية وكم الأخطاء إللى حصلت سواء من شباب الفيس بوك والتويتر وإللى مشيوا وراهم بحسن النية على مجموعة هواة سياسة على مراهقة سياسية تفوق خطورتها مراهقة الولاد والبنات فى عصر البانجو والدماغ العالية فبعد كل ده فيه حاجة إتغيرت والإجابة لا ...كل واحد بيعمل نفس العك إللى فضل يعمله فى الميدان وإللى بيعمل عجين الفلاحة مازال يعجن وإللى بيقلد نوم العازب مازال يحاول أن يتقن الدور أما لعب السياسة  بجد فهم أبعد من أن يعيشوا الواقع ويصلحوه.

طبعا الكلام ده مش من فراغ فيوم الدستور عملوا فيها سبع البرمبة وأول ما إنضربوا من فتوات الرئيس وجماعته جروا ناعم وإنسحبوا وعملوا لهم خيمتين فى صينية الميدان الملعون وشوية شوية كل واحد إنسحب بهدوء ليرجع الميدان للباعة الجائلين ونسيوا خازوق الدستور وقال لك مش مهم الدستور إحنا حا ناخد أغلبية البرلمان وإبتدوا يحلموا بإنهم كسبوا 600 كرسى من 500 نايب فى البرلمان وإنهم حا يعدلوا دستور أم أيمن بصباع رجلهم الصغير وبعدين حا يوروا الرئيس وأصحابة الشطار العين الحمرا فكل واحد يرجع يشتغل لمصلحة مصر مش مصلحة الجماعة وفجأة يدن الديك وتتوقف شهرزاد عن الكلام المباح لنكتشف بإننا كنا فاتحين البرنامج العام على فقرة فكاهية للراحل أبو لمعة والخواجة بيجو.

طبعا حا يطلعوا فى 25 يناير ويقول لك ثورة جديدة وكلام جامد قوى وحا يطلعا بكل حماسة ويقول لك أنا عبدالعال أنا بطل الأبطال ومع أول طوبة كله حا يجرى وبعدين نستنى يومين تلاتة الهوجة تهدى وبعدين نار الحماس تنطفى وكل واحد يروح بيته ويقول لك بلاش الثورة فى عام 13 وخلينا نستنى لما يعدى علشان التشاؤم مع وعد بالثورة الحقيقية إللى حاتجيب عاليها واطيها يوم 30 فبراير القادم وعليكم خير أى بعد إنتهاء 8 سنين مرسى و8 سنين شاطر و8 عريان على بال ما نحاول نقنع التاريخ إنه يزود يوم 30 فبراير علشان نصدق فى الوعد ونطلع بثورة تعدل المايل وتفضل البلد ماشية فى سكة الفشل إللى إحنا عملناه بإيدينا لغاية ما كل الناس إللى عاوزه تعيش عيشه كويسه فى حرية وإنتعاش إقتصادى فى بلد إقتصاده وعملته قوية ومفيش تمييز بين راجل وست وبين مسلم وقبطى تكون الناس الحلوة دى خلصت ورق الهجرة وسافرت بالسلامة ويسيبوا مصر لمن إختار الإخوان علشان يخربوها ويقعوا على تلها المخروب وإلى اللقاء فى ثورة 30 فبراير المجيدة

خرج علينا فرعون مصر الجديد رع مرسى رع حاكم الأسرة الإخوانية الأولى وحليف ونسيب الأسرة الحمساوية الغزاوية الأولى وقائد الحرب على الهكسوس الليبراليين والعلمانيين والأقباط والمصريين بالقرارات المناسبة لإبادة هذا الجنس وتعليمه الأدب وحا يمشيه على العجين ما يلخبطوش وفى سبيل تحقيق ذلك قرر الفرعون الجديد أن يحكم بغير قضاء والقاضى إللى يحكم بحكم يخالف العقيدة المرساوية يتركن على الرف كما قرر إن الدستور المعوق إللى بتعمله اللجنة الإخوانجية السلفيه حا يتعمل يعنى حا يتعمل ويمكن كمان يوفر علينا الإستفتاء عليه ويقول لك ما إنتوا حا تقولوا نعم إتلهوا على عينكم أنا بافهم أحسن منكم بلا إستفتاء بلا خيبة.

بخ يا قانون بخ يا عدالة بخ يا محكمة دستورية قطر مرسى السريع جاى حا يقش إللى يقف قدامه فشر ديموقراطية السادات أم أنياب وفشر جماهيرية الكتاب الأخضر وحا يطلع صدام تلميذ فى الحضانة جنب إللى حا نشوفه وطبعا حانشوف قباضيات الإخوان وهما محتلين الشوارع حاملين الأر بى جى وصواريخ إللى بتتمسك كل يوم ومش حا تتمسك إبتداء من النهارده وإللى حا يفتح بقه حا يتعدم فى الشارع زى ما بتعمل حماس ويتم سحله فى الشوارع لأنه عدو الثورة وغطينى  يا ثورة وزغرتى.

طبعا القناة إللى حا تفتح بقها هى عدوة الثورة وحا يقطعوا الكهربا عنها وكل مذيع حا يخاف على العدة ويروح يدفع الفاتورة والسمع والطاعة فى فرع المنيل أو المقطم حسب قرب الموقع لسكنه تسهيلا للحرية الإعلامية التى لا تخرج عن الخط الإخوانى المعروف وكل جريدة مش حا تراعى أخلاق القرية الإخوانية لا حاتلاقى حبر ولا ورق وبعد كده الجريدة عندها الحرية إنها تطبع الجريدة على روحها.

طبعا حا نشوف محاكمات ثورية وقطع رقاب حتى من تثبت براءته والشاهد إللى حا يقدم دليل فى مصلحة المتهم إعدام والمتهم إللى كان بيدافع عن قسمه أو سجنه إعدام وكل من شغل منصب فى النظام السابق ولم يغير جلده وياخد واحد كارنية حرية وعدالة إعدام والمجرم إللى حرق القسم شهيد والسجين إللى هرب من سجنه يا شهيد يا رئيس والحرامى إللى حرق أركيديا أشرف من الشرف والبلطجى إللى سرق المحلات وما طالهوش البوليس يا ياخد نجمة سينا يا وشاح النيل وإللى قتل المتظاهرين ولبسها فى الفلول حا يتعين رئيس حى أو محافظ على محافظة ما فهاش مزلقان علشان وجع الدماغ.

أما أنت يا من عملت فيها ثورجى وضحكت على الناس وكنت عامل فيها بطل الأبطال أو عاملة فيها جان دارك وبعد ما لبستونا فى حيطة الإخوان ويحكمنا الفرعون مرسى إختفيتوا وطلعتوا سراب فمنكم لله طبعا قاعدين بتتفرجوا على مصر وهى بتموت وإنتوا عمالين تهضموا الشاى بالياسمين وبتطرقعوا صوابعكم تكتبوا تويت هنا وتعملوا بوست ع الفيس بوك يا بتلعبوا جيم بلاى ستيشن مع المعلم الكبير وائل غنيم عن طريق الإنترنت وكل إسبوع والتانى تدخلوا على حسابكم الدولارى وتشوفوا هو نقص والا زاد ولو خسع الحساب شوية أهو تدوروا على إنترفيو فى أى قناة بتدفع بالدولار توزن الأمور بما يليق بمكانتكم فى النخبة إللى خيبت أمل الشعب المصرى إللى غمض عينيه ومشى وراكم وسمع كلامكم وخدعتوه بإنه حا ينتخب مرسى وما فهمتهوش إنه محتاج 4 شهور بس علشان يبقى الفرعون.

الخيبة القوية بإنتخاب الحاج أوباما للمرة التانية ناتجة عن تحولات خطيرة فى تكوين المجتمع الأمريكى حيث تحالفات الشامى على المغربى وكل حزينة بتبكى بكاها ولنكن صرحاء فقد فاز الحاج محمد حسين أوباما بأصوات المسلمين مع أصحاب البشرة السوداء بالإضافة إلى الشواذ وأنصار الزواج المثلى  والإجهاض فقد تجمع لون البشرة مع أنصار التيار الدينى وتحالفوا مع أنصار الإنحلال الأخلاقى والضحية هو السلام والتقدم والدليل على كده إن أمريكا إستلمها الحاج خربانة وحيسلمها للى بعده خرابة وفلسانة ويمكن منهارة.

وبعد خيبة الإنتخابات دى طلع إننا كلنا فى الهم شرق فمن خيبة الناخب الأمريكانى لخيبة الناخب المصرى يا قلبى لا تحزن  فلا هم عارفين إنتخبوا مين ولا ليه أهو كله محصل بعضه وطلع التقفيل الأمريكانى زيه زى التقفيل المصرى للمنتج المصنوع تحت السلم بس الفرق فى الشياكة فالمهزوم بيهنى الفايز ومابيخشش السجن عقابا ليه إنه وقف قدام سيادة الريس الزعيم المفدى صاحب محلات طائر النهضة إللى لا بيبيض ولا بيطير بس عامل زى البطة العرجانة تصعب عليك وما ينفعش حتى تدبحها وتستفيد من لحمها.

ولو تصورنا إن الإنتخابات دى كانت بين أبو تريكة وشيكابالا كان حا يحصل أيه ؟ الأهلوية كلهم حا ينتخبوا أبو تريكة والزمالكاوية الإخوان زى الريس مرسى برضه حا ينتخبوا أبو تريكة وإللى حا ينتخب شيكا هما الزمالكاوية المخلصين للزمالك ونفس الشيئ مع الحاج أوباما الجماعة السود زى أوباما إنتخبوا أوباما علشان هو واحد من فريقهم وجماعة الإسلام السياسي مع جماعة الزواج المثلى والشواذ بيشجعوا أبو تريكة بتاعهم لأنه بيعمل لهم إللى هما عاوزينه ويؤمنوا بيه أما الغلبان شيكا فبالرغم من إنه حريف فا محدش بيحبه غير الغلابة إللى بيشجعوا أمريكا أو الزمالك بإخلاص شديد.

أوباما عمل إللى أسامة بن لادن مقدرش عليه لما بوش قصقص ريشه وهده وحاصره فى كهوف أفغانستان وفى ريف باكستان وكان هدف بن لادن إنه يهد أمريكا ويبنى الخلافة ويكون الخليفة ولكن الحاج أوباما خلص عليه وقام بالمهمة بداله وأمريكا على وشك الإنهيار الإقتصادى وبقت عامله زى الحمل الوديع فى مقابل النمر الإيرانى وبنى إمبراطورية إخوانية على جثة مصر وليبيا وتونس وجارى العمل على توسيع الخلافة لتشمل سوريا بعد ما جاب عاليها واطيها وحولها لوكر للقاعدة وماحدش بيقول له رايح على فين ياحاج كفاية كده خربتها بالقوى وإذا كان قدر يخرب الدنيا فى 4 سنين فاياترى حا تكون الدنيا شكلها أيه بعد 8 سنين أوبامية وما أعتقدش إن إللى فات حا يبقى أحلى فزمن الغنا والجمال عدى وبقينا فى زمن غسيل المخ والضحك على الدقون ومش لاقى حاجة أقولها فى النهاية للناخب الأمريكى والناخب المصرى غير  نشنت يافالح...نشنت ونشانك رشق

هناك فرق بين المؤسسة والطابونة وهناك فرق بين الإدارة والتكية وهناك فرق أن تكون رئيسا لكل المصريين وأن تكون رئيسا لكل الإخوانجية هناك فرق أن ترى بعين واحدة فترى الأشياء مسطحة وثنائية الأبعاد وبين أن تري بالعينين فترى الأشياء بعمقها وبثلاثية الأبعاد وهناك فرق بين العدالة والإنتماء الحزبى وهناك فرق بين المساواة والتمييز وهناك أيضا فرق بأن تيجى تكحلها فتعميها.

إنتظر الكثير الفريق الرئاسى المعاون للرئيس كأخر أمل فى أن يعدل المايلة وأن يخرج مرسى الرئيس من عباية الإخوان ويتصرف بشكل سياسى وليس بحكم إنه بيعمل فريق رئاسة لأهله وعشيرته إللى طلع إن أهله هم الإخوان وعشيرته هما السلفيين أما باقى التسعين مليون فدول فلول وما يجوز عليهم حتى الرحمة لكن هو بيتصرف لأن العزبة الجديدة يملكها المرشد وأعوانه والحكاية كلها ترتيب البيت لأهل الجماعة.

خرج الرئيس بفريق رئاسى على ما تفرج فيه المطبلاتى والكلامانجى وإللى ما بيعرفش يدير مكتبه وجاب حبايبه وأصحابه كأننا رايحين عزومة على كباب أبو شقرة والمصيبة السوده إنه بيصر على إنه يمشى على خطى النظام السابق فيدور على الحيطة المايلة فى مصر ويجيب لهم أوحش الوحشين وأبعد شخص على تمثيلهم وزى ما كان حكم الحزن الوطنى يجيب محافظ قبطى يكون همه الأوحد التنكيد على الأقباط ولما يعين قبطى فى مجلس العز وأكل الوز يجيب القبيح والأتعس وكأن ملقاش فى قفص القوطة غير المفعص والحمضان.

إختار الريس قبطى أبعد ما يكون عن الأقباط وإختار شخصية مسيحية بالإسم لكن الفعل إخوانى مليون المية وأحسن تعليق لإختيار الرفيق الإخوانى صموئيل هو تعليق إستفان روستى نشنت يا فالح فبأى أمارة تعين هذا الرفيق ممثلا للأقباط فى فريق الرئاسة يعنى ممكن تجيب لى ولو ربع سبب إنك تجيب الإخوانجى قلبا وقالبا المسلم المتخفى فى صورة قبطى رفيق حبيب .. لكن أنا عندى السبب هو إن مرسى بيقول للأقباط موتوا بغيظكم وكأننا بنلعب فى الشارع وفتوة واقف فى الشارع وبيقول للناس وبيخوفهم حد ليه شوق فى حاجة.

تانى أسوء إختيار هو إختيار من كان يكدب جهارا نهارا على الأسلحة الموجودة فى الأديرة وكان بيهيج الناس وسايق الغنم فى مظاهرات كاميليا ووفاء وكان عامل زى المعددة فى الجنازات وكان حا يولع البلد باللى فيها وإللى لما سألوه حا ترشح نفسك فى الإنتخابات قال هو أنا قادر أمشى مكتبى لما أرشح نفسى لكن لحس كلامه ورشح نفسه وخد ييجى خمسميت ستميت صوت بالعافية لأن الناس ما إتعميتش علشان تصوت لواحد بيعوى ليل ونهار.

واضح من الإختيارات إنها إختيارات لطابونة مش لمؤسسة الرئاسة ولكن الغريب إنى لحد دلوقتى ما حدش علق على تشكيل الفريق الرئاسى ده والظاهر إن الناس كلها إللى كانوا عاملين فيها سبع البرمبة لموا الدور ولما تسألهم هو فيه أيه يقول لك شوفوا الحكمة من رأس عكاشة ورقبة نخنوخ وصباع جرنال الدستور المقطوع وأسم شفيق المطلوب وجثة الجنرال المقتول الذى مات وسره معاه ونظام كامل يسكن فى طرة وأعضاء مجلس الخروج الآمن وأبو حامد المضروب وإللى يتلسع من الشربة بينفخ فى الزبادى والإعلام دخل الجحور والكل بيطبل و يزمر فمين إللى حا يعمل فيها فلحوس ويفحص ويمحص فى فريق الرئاسة ما يعملوا إللى هما عاوزين مش عزبتهم وهما حرين فيها يجيبوا رفيق يجيبوا سليم ما هى غرقانه غرقانه مش هما وعدونا بالنهضة وطلع إن نهضة مصر مربوطة على ضهر قرموط والقرموط راح بحر الصين هناك وفطس لأنه كان فاكرها ميه عزبة لكنها طلعت مية مالحة ففطس وإستقر فى بحر الظلمات يالطيف اللطف يارب فإذا كان النهضة مش موجودة حا نوجع دماغنا بالطابونة قصدى فريق رفيق وسليم !..يا عمى قول يا باسط.  

بالرغم من إختلافى مع حكم مبارك فى كثير من الأمور وبالرغم من الكثير من الحوادث التى حدثت فى عهده لكنى حزين جدا على ما حدث له ومن التنكيل بشخصه وعائلته ومرمطة كرامتهم الأرض بطريقة سادية ووحشية تفوق إعدامهم جميعا تعاملنا معهم بإحتقار بينما كان جميع السياسيين بما فيهم المعارضين وأصحاب المعالى السادة ثوار التحرير وأقول جميعهم كانوا يبوسون الأيادى طالبين الرضا وعندما سنحت الفرصة تنكروا جميعا له ورموه رمية الكلاب فى سجن طرة للتشفى فيه وحتى تلك الرمية مش مكفيه ونفسهم يسحلوه فى الشارع وأنا هنا أوجه كلامى للشعب العادى المحترم مش للنخبة إللى جابوا لنا النكبةوالكافية و حا أفكرهم ببعض أعمال تمت فى عهد مبارك وعهده الذى يجب أن ننظر له بما له وما عليه وبدون غل ووتشفى

1 إنقاذ أسيوط من إقامة ولاية إسلامية عقب مقتل السادات والقضاء على إرهابهم وتفجيراتهم فى شوارع المحروسة

2 إخراج كل المساجين السياسيين وإستقباله لهم ليفتح صفحة جديدة معهم

3 إقامة ثلاث خطوط لمترو الأنفاق وتخيلوا القاهرة بدونهم الأن

4 تحويل شرم الشيخ من حتت فندق يتيم بناه الإسرائيليون إلى منتجع عالمى يضارع مثيلاته فى العالم إن لم يتفوق عليهم

4 تحويل الغردقة إلى جنة سياحية بعد أن كانت منفى

5 بناء كوبرى فوق قناة السويس

6 إستكمال وتطوير كوبرى 6 أكتوبر

7 كوبرى 15 مايو وروض الفرج وباقى الكبارى على النيل

8 المدن الجديدة مثل 6 أكتوبر الرحاب القاهرة الجديدة التجمع الخامس مدينتى إلخ

9 مدينة الإنتاج الإعلامى والطفرة الإعلامية والتى يتم بها شتم ومسح كرامة مبارك وأهله

10 النايل سات و والقنوات الفضائية التى أنعمت بالملايين على أمثال محمود سعد بالملايين ليتم بهدلة حسنى بكل عنف

11 إزدواج خط السكة الحديد لمظاليم الصعيد وتطوير السكة الحديد بزيادة سرعة القطارات

13 شركات المحمول وجعل خط التليفون بإتنين جنية وكل فسل معاه أكتر من موبيل

14 خدمات إنترنت متقدمة تسبق كثيرا بلدنا المتخلفة

15 مطار القاهرة الجديد ومطار شفيق الجديد نوفى بالغيظ فى محمد مرسى بتاع أبحاث ناسا المضروبة

16 تطوير الساحل الشمالى ليتحول إلى منتجعات راقية بعد ما كان شوية رمل وميه

17 تطوير كورنيش الأسكندرية

18 مكتبة الأسكندرية العظيمة

19 الأوبرا المصرية الحضارية

20 الفنادق السياحية الفاخرة مثل الفور سيزون وسميراميس وغيرها

21 المراكب السياحية العائمة

22 إنضمام مصر للطيران إلى تحالف مع شركات طيران عالمية مثل لوفتهانزا وأير كندا

23 تيار كهربى لا ينقطع

24 المياة تصل للأدوار العليا

25 توافر السلع الغذائية وعدم حدوث أزمات مثل السابق كأزمة الصابون والزيت والسكر

26 دخول الجيش كمجند وخروجه دون فزع أو خوف من أن يقتل أو يقضى باقى عمره مستنى إنتهاء مدة التجنيد الإجبارى زى أيام الحروب

27 إغلاق معابر الإرهاب الفلسطينى وعدم وصول إرهابهم إلينا لغاية ما جه الإخوان وحدودنا بقت خرومها أوسع من عين الشمس

28 قانون الخلع

29 تجريم الختان

30 مهرجان القراءة للجميع

31 مصرى يفوز بمركز الأمين العام للأمم المتحدة

32 مصريون يفوزون بجائزة نوبل للسلام والعلوم والأداب

33 مستشفيات مصرية راقية تقدم خدمات تقارع مثيلاتها بالخارج مثل دار الفؤاد والمركز الطبى العالمى ومستشفى شرم الشيخ وغيرهم

34 تطوير الطرق السريعة مثل الطريق الصحراوى وحتى مرسى مطروح وأسوان

35 عروض الأوبرا العالمية مثل أوبرا عايدة ومهرجانات ثقافية ومسرحية وسينمائية

36 مولات على أعلى مستوى مثل سيتى ستار وأركيديا التى تم حرقه على يد ثوار الإخوان والبلطجية

37 جاينت ستورز زى كارفور ومترو وغيرهم

38 مركز القاهرة للمؤتمرات

39 دورة الألعاب الأفريقية وتطوير مجمع إستاد القاهرة

40 فوز مصر 3 مرات متتالية بكأس أفريقيا وفوز الأهلى والزمالك والمقاولين بكل البطولات الأفريقية

41 عدم إعطاء الجيش والشرطة الأوامر بضرب المتظاهرين بالنار ولو كان هناك عسكرى واحد كان عنده أوامر بضرب النار كان برشاش واحد موت مئات المتظاهرين وإسألوا حماس وحزب الله والإخوان مين إللى قتل المئتين متظاهر فى التحرير أما الباقى مات مقتول على أبواب السجون وقدام الإقسام أثناء تنفيذ عملية إنهيار الأمن علشان يسقط النظام والدولة وبكرة تنكشف الحقيقة ونعرف مين القاتل الجبان.

الإنجازات السابقة إشتغل فيه ملايين وإستفاد منها ملايين ومش معنى كده إن كله تمام لكن الراجل إشتغل وحكم 30 سنة أخطأ وأصاب ومشى وإرحموا سنه وإنه رجل أعزل إنسحب وما هربش من البلد وكان زمانه عايش ملك زمانه بيتفرج علينا وإحنا خاربين البلد بأيدينا وبقى لنا سنة ونص قاعدين متسولين فى التحرير الحاجات إللى كان ممكن يعملها فى شهرين تلاتة لو كنتوا صبرتوا عليه

إفرجوا عنه إفراج صحى عفو أى حاجة بس تصرفوا بشهامة الفارس إللى لو وقع غريمه من على حصانه لا يقتله ويتركه إما إن يفر من أمامه أو يكون قادرا على العودة لحصانه ليقاتله بنزاهة ونبل

بنجاح منقطع النظير يستمرعرض مسرحية عممنى يا مرسى التى مازلت تعرض فى سينما التحرير منذ 16 شهرا متفوقه على فيلم خلى بالك من زوزو وأبى فوق الشجرة الذين رفعا من العرض بعد 52 أسبوعا فقط كما أن المسرحية تحقق أعلى إيرادات الشغب والبلطجة والصوت العالى ووقف الحال كما أنها مسرحية لأصحاب المزاج العالى الذى يبهرهم التسجيل فى التليفزيون أو أن يتحولوا لسوبر ستار فى قناة 25 خساير.

والفصل الأول من المسرحية يتم فيها التسخين فى الميدان زى كل المسرحيات وبعدها يخش النجم الأول للمسرحية إللى كل الناس حا تخدم عليه باقى الثلاثة فصول وبعد ما كله يبقى تمام يظهر المرسى وأصحابه وسط تهليل أنصارهم ونبتدى وصلة المديح للبطل وتتوالى الأحداث من ضرب على خناقات وناس تتبهدل وناس تموت وناس هدومها تتقطع علشان المؤلف والمخرج يحللوا الفلوس إللى دفعناها علشان نشوف البطل على المسرح.

ونخش على الفصل التانى لما البطل يخش فى صراعات وهمية علشان يفوز بقلب البطلة ويبذل الغالى والنفيس من أكياس السكر والزيت ومفيش مانع نجيب واحد بدقن طويلة علشان يقول للبطل لابد أن تدخل بها والدين بيقول أييييه؟ونقعد نتفرج على البطل وهو عمال يكسب دايرة دايرة لغاية أخر الفصل التانى نلاقى البطل قاعد وحواليه قرطة من النواب وعمالين يغنوا أغانى’’ وناسبنا  الحكومة وبقينا قرايب " ماهم خلاص إتجوزوا عبد العال وبقت الدنيا أمان فى بيتهم إللى ورا قسم كرموز بالأسكندرية.

أما الفصل التالت والأخير نلاقى فيه عقبة صغيرة قدام البطل وهى إنهم يدخلوا إنتخابات العمودية علشان العمدة وشيخ الغفر والغفر يبقوا كلهم إيد واحدة يا بهجت ولازم يعملوا الإنتخابات لكن كان فيه شوية شباب معصلجين معاهم قوم أيه يعملوا لهم شبورة جامدة ويقولوا لهم يوم الإنتخابات إن العمدة القديم حا ييجى الميدان إللى جنبهم علشان يصطادهم واحد واحد ويمكن يطلع فى الميدان فى أى لحظة من طلوع الشمس لغاية أخر النهار فروحوا إنتوا الميدان وإستنوه هناك وإحنا حا نخلى بالنا من إنتخابات العمدة ومنافسنا هو إللى دعى العمدة القديم علشان ييجى فإللى حابب العمدة مرسى يعمل حاجة من تلاتة يا يروح الميدان وما يروحش الإنتخابات وبكده صوته مش حا يروح لمنافس مرسى أو يقعد فى البلد وبدل ما يدى منافس مرسى يروح يبطل صوته لكن ما تقلقوش أصحاب مرسى قاعدين مخليين بالهم من الصندوق وفى السر حا يصوتوا لمرسى أو الحل التالت إنكوا صحيح ما بتحبوش مرسى لكن صوتوا له لأنه حا يصوت عليكم بعد كده .... المهم السيناريو الحمضان شغال وحنلاقى أخر المسرحية الشباب راجع من الميدان وعلى راس كل واحد فيهم عِمة كبيرة وراجعين ومعاهم السلطنية بتاعت بحر الظلمات  وشايلين اليافطة الكبيرة مكتوب عليه عدى النهار والعمدة ما جاش ولا ظهر ولا بان وكل واحد من الكومبارس عمال يصرخ ويهتف ويقول والستارة نازلة بشويش : عممنى يا مرسى 

هاتسى

يرحمكم الله يا أبو إسماعيل

مش أنا إللى عطست يا ريس

يرحمكم  الله يا ولاد الشاطر

مش أنا إللى عطست ياريس

يرحمكم الله يا ولاد التحرير

مش أنا إللى عطست ياريس

ولا إنت؟ ...... ولا أنا ..... ولا إنت ؟ ...... ولا أنا .... ولا أنا .... ولا أنا

يعنى ماحدش عطس فيكم .... يبقى لازم فيه حد غريب

حد غريب !!!!!!!

إمسك إلحق حلق حوش  ويلا بينا ندور على الغريب إللى دخل مغارة على بابا علشان يكوش على الكنز المدفون

وهكذا الحال كل فصيل من إللى ربنا رزقنا بيها يعمل المصيبة وبعدين يقول لك مش أنا إللى عطست قصدى عملتها يا مجلس يا عسكرى ونفضل ندور على لهو خفى كل واحد من دول يعملها مرة وتتفرق الدماء بين القبائل وماحدش بيسمع وما حدش بيفهم ولا بيتعاقب ما هو اللهو الخفى زكى جدا وكل مرة يطلع من حتة ومن تبع فريق مختلف يبقى ما حدش حا يتقفش لغاية ما الدنيا تخرب خالص

نيجى يوم موقعة الجمل كان مبارك خطب الخطبة العصماء إللى خلت بتوع التحرير يلموا عزالهم ويمشوا يقوم اللهو الخفى إللى كان لسه نازل الملعب وحا يخسر كل حاجة لو مبارك إستمر ما هو محظور بقى يقوم يلعب من ورا الكواليس وتحصل معركة الجمل علشان إللى مشى من الميدان يرجع ويلبسها الفلول و تبقى زى مسمار جحا لأى حد يضايق أصحاب طظ فى مصر

معركة محمد محمود مين إللى ولع الدنيا بالمظاهرات وإللى إتقتل فيها شباب ما لهوش ذنب غير إن تيار التحرير حا يطلع من مولد الإنتخابات بلا حمص وسودانى ولا حا يطول بلح البرلمان ولا عنب الشورى يقوم يعملوا أيه يولعوا فى البلد وتتعرى البنات فتولع أكتر ويمكن الدنيا تخرب فيلغوا الإنتخابات وطبعا يطلع إن السبب فى محمد محمود لهو خفى غير اللهو الخفى بتاع الجمل وأهو كله لهو مخفى ومحدش بيفتح المندل اليومين دول علشان نعرف الفاعل!!!

ونيجى لمعركة العباسية إللى ولاد أبو إسماعيل طلعوا علشان يجروا شكل العسكرى ويولعوا الدنيا علشان سمعة يخش الإنتخابات بالرغم من عدم إنطباق الشروط إللى قعدوا يألفوها مع البشرى و صبحى صالح علشان يقلشوا الناس المحترمة ومحدش كان فاكر إن ملعوب الباسبور الأزرق حا ينكشف وطبعا علشان نولع الدنيا وأولاد أبو إسماعيل يكون ليهم نصيب فى اللهو الخفى تحصل مجزرة العباسية ويطلعوا ويقول لك مش إحنا السبب وبرضه يطلع اللهو الخفى إللى بيطلع بالليل والدنيا ضلمة والديابة بتعوى وبرضوا محدش شايف ولا عارف ننوس عين اللهو الخفى.

طبعا زى زمان أيام ما كان كل حاجة يطلع ليها صباع خارجى يلعب فى الموضوع و برضه بعد ما مشيوا بتوع الصوابع الخارجية رجعوا لنا الصوابع تانى بس على أيدين إللى قلبوا لنا الدنيا وما عرفوش يعدلوها وكل واحد فينا وفيهم عامل عبيط وماشى ورا الزعيم يلزقها لأقرب صباع ويقول لك لازم فيه هنا حد غريب ما دام كل واحد بيقول مش أنا إللى عطست يا مجلس أو يا ريس مش فارقه ما دام كلمة السر مدفونة فى الميدان ومغارة على بابا مغلقة للتحسينات