خرج علينا فرعون مصر الجديد رع مرسى رع حاكم الأسرة الإخوانية الأولى وحليف ونسيب الأسرة الحمساوية الغزاوية الأولى وقائد الحرب على الهكسوس الليبراليين والعلمانيين والأقباط والمصريين بالقرارات المناسبة لإبادة هذا الجنس وتعليمه الأدب وحا يمشيه على العجين ما يلخبطوش وفى سبيل تحقيق ذلك قرر الفرعون الجديد أن يحكم بغير قضاء والقاضى إللى يحكم بحكم يخالف العقيدة المرساوية يتركن على الرف كما قرر إن الدستور المعوق إللى بتعمله اللجنة الإخوانجية السلفيه حا يتعمل يعنى حا يتعمل ويمكن كمان يوفر علينا الإستفتاء عليه ويقول لك ما إنتوا حا تقولوا نعم إتلهوا على عينكم أنا بافهم أحسن منكم بلا إستفتاء بلا خيبة.
بخ يا قانون بخ يا عدالة بخ يا محكمة دستورية قطر مرسى السريع جاى حا يقش إللى يقف قدامه فشر ديموقراطية السادات أم أنياب وفشر جماهيرية الكتاب الأخضر وحا يطلع صدام تلميذ فى الحضانة جنب إللى حا نشوفه وطبعا حانشوف قباضيات الإخوان وهما محتلين الشوارع حاملين الأر بى جى وصواريخ إللى بتتمسك كل يوم ومش حا تتمسك إبتداء من النهارده وإللى حا يفتح بقه حا يتعدم فى الشارع زى ما بتعمل حماس ويتم سحله فى الشوارع لأنه عدو الثورة وغطينى يا ثورة وزغرتى.
طبعا القناة إللى حا تفتح بقها هى عدوة الثورة وحا يقطعوا الكهربا عنها وكل مذيع حا يخاف على العدة ويروح يدفع الفاتورة والسمع والطاعة فى فرع المنيل أو المقطم حسب قرب الموقع لسكنه تسهيلا للحرية الإعلامية التى لا تخرج عن الخط الإخوانى المعروف وكل جريدة مش حا تراعى أخلاق القرية الإخوانية لا حاتلاقى حبر ولا ورق وبعد كده الجريدة عندها الحرية إنها تطبع الجريدة على روحها.
طبعا حا نشوف محاكمات ثورية وقطع رقاب حتى من تثبت براءته والشاهد إللى حا يقدم دليل فى مصلحة المتهم إعدام والمتهم إللى كان بيدافع عن قسمه أو سجنه إعدام وكل من شغل منصب فى النظام السابق ولم يغير جلده وياخد واحد كارنية حرية وعدالة إعدام والمجرم إللى حرق القسم شهيد والسجين إللى هرب من سجنه يا شهيد يا رئيس والحرامى إللى حرق أركيديا أشرف من الشرف والبلطجى إللى سرق المحلات وما طالهوش البوليس يا ياخد نجمة سينا يا وشاح النيل وإللى قتل المتظاهرين ولبسها فى الفلول حا يتعين رئيس حى أو محافظ على محافظة ما فهاش مزلقان علشان وجع الدماغ.
أما أنت يا من عملت فيها ثورجى وضحكت على الناس وكنت عامل فيها بطل الأبطال أو عاملة فيها جان دارك وبعد ما لبستونا فى حيطة الإخوان ويحكمنا الفرعون مرسى إختفيتوا وطلعتوا سراب فمنكم لله طبعا قاعدين بتتفرجوا على مصر وهى بتموت وإنتوا عمالين تهضموا الشاى بالياسمين وبتطرقعوا صوابعكم تكتبوا تويت هنا وتعملوا بوست ع الفيس بوك يا بتلعبوا جيم بلاى ستيشن مع المعلم الكبير وائل غنيم عن طريق الإنترنت وكل إسبوع والتانى تدخلوا على حسابكم الدولارى وتشوفوا هو نقص والا زاد ولو خسع الحساب شوية أهو تدوروا على إنترفيو فى أى قناة بتدفع بالدولار توزن الأمور بما يليق بمكانتكم فى النخبة إللى خيبت أمل الشعب المصرى إللى غمض عينيه ومشى وراكم وسمع كلامكم وخدعتوه بإنه حا ينتخب مرسى وما فهمتهوش إنه محتاج 4 شهور بس علشان يبقى الفرعون.
0 comments:
إرسال تعليق