التوقعات المرئية لرئاسة الجمهورية/ فاطمة الزهراء فلا‏

كان ياما كان يا سعد يا إكرام ولا يحلي الكلام إلا بذكر النبي عليه الصلاة والسلام ..وللرياسة كراسي إتقدم ليها العاقل واللي مش راسي ..آه يا راسي ..سعد الصغير وابوصلاح

وإللي غاويين ع الورق إصلاح ومنهم الخايب ومنهم الشاطر وكلها أيام وينفض المولد , ويخلص السامر.

يقول الراوي بعد مرور قرن من الزمان : ياسادة كان ياما كان في سالف الأزمان رئيس وسيم طيار حواليه ألفين حمار بيحكموا الديار , ووزعوا التركة من الذهب , والدنانير , ومن الآثار , وفي يوم الشعب هب وثار , وطرد التتار , ورماهم ورا الأسوار , ومات الطيار , ومراته , وولاده , وتاريخهم متلطخ بالعار , ونهايته كانت معجزة وسر م. الأسرار لكل طاغي كان جبار , حكم شعبه بالحديد والنار , وبقت حكايته علي كل لسان , وصبحت امبراطوريته في خبر كان وضاع من المملكة الأمان , ورجعوا الرجالة يلبسوا العمة والقفطان , ورجعت ستي تستخبي ورا اليشمك وتستني سي السيد لغاية مايبان له بيان ..مرة يقولوا عند شهرمانة , ومرة يقولوا عند كهرمان.

وشاه بندر التجار بيلم الجباية وبيموت في قعدة النسوان ..زنوبة , وحبوبة , والحلوة فرط الرمان وجمالهم جنان ف جنان , أما الصبيان الدقن علي صدرهم , الله ينور ياشيخ مرجان يا اللي مخاوي الجان .

وقال جحا في ذات نهار أنه ليس لدي حمار , فأشار عليه أهل الخير والإحسان أن شاه بندر التجار مجلسه كله حمير وفي حراسته ألف ناقة وبعير , والويل والتجريس لأي بعير صاحي ومش نعسان , واشتهرت المملكة بتصدير المسك والسواك أشكال علي ألوان , وانقسمت المملكة ولايات كل ولاية وليها حرامي , قصدي والي ومعاه مسئول إعلامي , وظيفته الدوي ع الودان , مرة يقول الوالي مسافر أسوان ومرة يقول الوالي زهقان ’ مفيش فلوس وفي الديون غرقان ,ومرة يقول الأمير اشتري بهارات عشان طبيخ النسوان , ومرة يذيع إن جوزة الطيب الشيخ عليها غضبان , ومرة يقول للرجالة لكل واحد أربعة , والستات متجمعة رافعين راية العصيان وطلعوا في مظاهرة كبيرة في الميدان , اللي سموه الشيخ ريحان يتجمع فيه كل غضبان , يشرب كيس خروب يلقي نفسه سعيد فرحان ويروح لبيته , وتهيص النسوان , وفيه شوية فتوات ماسكين النبابيت حالفين للوالي علي علقة تورم رجليه وقفاه وياويله لو يقول الآه , ها يعزلوه في التو والساعة , ويعلقوه في الشماعة , ويدفنوه في البلاعة , ودي حقيقة مش إشاعة , ولا شغل بروباجندا , بانوراما كوميدي ياجماعة بتحكمنا النهاردة , وإن كنت من الفلول أنا برده حوت وغول , , ومش دلدول عمري ما بطلت أكل الفول ,

وفي الأسواق انتعشت تجارة الامشاط والفلايات والسكر النبات ..يابنات يا بنات ..يابنات وقد اقتصرت الاعلانات علي الطرح والخمارات والعبايات وقد غنت المطربات ياحلوة يا منقبة وشاطرة ومؤدبة جوه البيوت تقعدي ترقعي الشربات .

هذا وقد صرح الشيخ الوقور , الخفة الدبور بأنه قد زارتنا السيدة المبجلة بنت بنت بنت هلاري بعد ماغلبت فينا رنات , وقالت يا لهوي نايمين علي ودانهم أوصلهم إزاي وبيني وبينهم مسافات ولا فيش عندهم موبايلات ولا ايميلات , وقطعوا الفيس بوكات اللي كانت سبب ثورتهم , ولما جت شافت العجب وضحكت في سرها وقالت والمسيح جدتي في وكستهم كانت السبب , فضلت تدبر وعلمتهم الأدب , والله يرحم حضارتم وشوية الفراعين , وبيغنوا للتعليم يا مدارس ..يا مدارس ..يا ما كلنا ملبس خالص , وآخرتها يا رياسة ومقالب والكل عليها متكالب , يا تري مين مغلوب , ومين غالب , ومصر رايحة لفين يا فران وتعالب , فران بتتداري وتعالب فاكرة الرياسة مصالح وبزنس وشطارة , وفلول سرقوا قوت ولادنا في طيارات ومراكب , وحقيقي ديل الكلب لن ينعدل ولو علقوا فيه ألف قالب