الله يعين/ عصام ملكي

بعيد ... الابانا وبريت الشفـّه
ومش عم بيوصل عا السما صفـّي
دقت البلا وطعميت "بشمزين"
عن بو جنب شو كنت عم لفـّي

هلق عليي عامل قوانين
كاسي مع الكنفوش ما بقفـّي
وبقول الله دخل اسمو يعين
تا صير اعرف وين رح صفـّي

رح ينقطع قلبي بقلة دين
للهم منها الروح مشتفـّه
من مي كل بضاعتي ومن طين
ما بقيت القى صرت عا الحفـّه

منـّو ضروري ساير شياطين
ما زال بلـّش ينقرا كفـّي
قرّبت عا الطلعه من السبعين
المنـّو خواجا يضل عني بعيد
عندي وجع بالراس بيكفـّي

CONVERSATION

14 comments:

غير معرف يقول...

ما حدا فاضيلك يا عصام.. ازا انت تعبت من اصحابك كمان اصحابك تعبوا منك.. بالناقص واحد

غير معرف يقول...

are u real? mate.. nobody care about your friendship. stop writing silly thing
Ex- friend

ندى ـ ملبورن يقول...

فاجأت بهالتعليقات ع شاعر عم يكتب قصيده وجدانية حلوة.. الظاهر في زعل بين الشعراء بالجالية ونحنا مش عارفين.. شفتو ليش ما عاد حدا يقرا شعر.. عصام ملكي كاتب قصيده فلسفية قاموا فلسفوها ع ذوقن

مصطفى الحامد ـ الاسكندرية يقول...

أنا ما بفهمش الزجل اللبناني بس قدرت افهم القصيده دي حرفياً واعجبت بها جداً جداً.. واللهي دي حتة قصيده بتجنن

Jamila Hanna - Lebanon يقول...

Allah y'een qasidi helwi ma biha shi, issam milki aw malaki ma hamm shaiir kbiir wma indou takseer blwazin metel ghayrou min al shouara ana bearalou wbefrah

قارىء ـ سيدني يقول...

عصام ملكي كتب شعر جاوبوه بالشعر تا نشوف مين بيربح

عصام ملكي يقول...

تعليق عا تعليق

يا فيلسوف العصر لا تعدّي
لعندي بقا تا تلبس الشدّه
حفيان بعدك يا ابو الهمات
وما بتعرف المدّه من الشدّه

اياك تنسى في معي شهادات
مَنّو سوا التعليق عا الردّه
كلمة اذا «بالذال» الها ذات
مش «زين» بدها بساحتك هدّي

بْصَيب الهدف عم آخد علامات
والمدّعي عا جهنم بودّي
لا تفتكر يا بو خمس ردّات
بتوقف بقلب المجتمع حدّي

ويا باعتين عْلى الهوا سلامات
وبتشلحو بوسات عا خدّي
قولو لهلّي بيسحبو لسانات
ان كان شعري ما الو اجرين
بيضل يوصل مطرح البدّي

عصام ملكي



شاعر مجهول يقول...

بدّك شعر.. منجاوب بأحلى شعر
بدّك نثر.. منركّع حروف النثر
المهم إنو تطق من كتر القهر
وتطقّ حدّك كل "صيصان" الغدر
جايي تا قبّع شوك ويفوح الزّهر
جايي تا إنهي الليل ويشعّ الفجر
جايي تا سكّت "ديك" صيحاتو كفر
جايي تا قلّو حلّ دوّخت الهجر
بكسر جناح "النسر" تا إكتب أنا
للي بينقّ كتير ما عندي صبر

ماري كيروز ـ مونتريال ـ كندا يقول...

الى حضرة المسؤول عن موقع الغربة المحترم
الرجاء.. الرجاء.. الرجاء.. إيقاف هذه الحرب اللعينة بين الشعراء.. يكفينا حروب زعمائنا في لبنان.. ماذا أصاب هؤلاء الشعراء.. ولماذا يتقاتلون؟ هل للتسلية أم لتكريه الناس بالشعر والشعراء؟ أريد أن أسألكم: من يقرأ الشعر في هذه الأيام؟ لا أحد على الاطلاق.. تعرفون لماذا.. لأن الشعراء، أجل الشعراء طعنوا الشعر في الصميم وكرّهوا الناس به بسبب تصرفاتهم المخجلة.. أوقفوا هذه الحرب المضحكة.. قبل أن يلعنكم التاريخ.. قال شعرا قال.. يا بعدي

طوني حنّا النسر يقول...

قصيدة طوني حنّا النسر بعنوان
روح انطمّ مين ما تكون

تخمين جوّ الشعر( بالغربه) التهب
ومن ضربة المسمار (منفوخ) ارتهب
المنّو حدا وبيضلّ ماشي بمنحنى
حقوق الخليقه بسحبة لسانو نهب
بعرف عصام بكلّ أصحابو اعتنا
وأبيات شعرو بالسما بترمي شهب
من المستحيل نقول عنو بالغنا
إلاّ عا درب الخير ما بعمرو ذهب
في ناس عملو من العتابا ميجانا
وتضايقو من نبوغ شاعر منوهب
قال المتل... وبعيد كلماتو أنا
لو كل ّ نبحة كلب رميولا حجر
كان صخر الصمّ أغلى من الدهب

طوني الهاشم ـ سيدني يقول...

شعر الزجل هو شعر منبري وحوار أجمل ما فيه العنتريات:

يا ست ماري ليش طالعتي
شعر الزجل ما زال مش مرغوب
حالك بها الكلمات ناقضتي
شو حاوجك تا تبعتي مكتوب

Al-ghorba يقول...

لمعلومات بعض الناس لقد تجاوز عدد قراء هذه القصيدة 1100 قارىء وهذا الرقم يعتبر عالياً جداً في عالم الانترنت ودليل واضح على محبة الناس لقراءة الشعر الزجلي.. مع العلم انه بدون الزجل لا توجد أغنية تغنيها الأم لطفلها أو الحبيب لحبيبته ولجميع المناسبات..

J Najjar - Coffs Harbour يقول...

To whom it may concern,
you made me cough. I have read the poetry written by Sam Melkey and i have to say to the 'ex friend' that i dont understand your comment.

If you really are an 'ex friend' then why would you be bothered to even comment? Why does this concern you so much?

I doubt you have even read the poetry - if you did you would not have made such a comment. I have answered you in english so that you understand

طوني حنّا ـ النسر يقول...

غنيّة شعر التفقيس

طوني حنّا ... مش شيبوب
عنتر عبس بسدني صار
بالغربه شعرو المرغوب
ما بدّو تفقيس زرار

... هل بيعيشو بالأحلام
مش معقول يصيبو علام
شعرن أسمو صفّ كلام
وهل بيطالع منّو حمار

يا معمّر بيت بلا أساس
وضارب أخماس بأسداس
كل ما تاكل حقّ الناس
الداعي بيقلّك فزّار

مين القلك شاعر مين
تا تتحدّى الله يعين
طوني داعس عا التسعين
وبعدك ماشي عا البومار

بدّك يا غربه عا الشعر حرّاس
البيحرتقو مش خرج دق جراس
واحد عمل حالو ابو فراس
وواحد ندب بيقول بالأعراس
بتبقى القصيدي بآخر الصفحه
بدقيقتين بتوصل على الراس

الشاعر طوني حنّا ـ النسر